Comprar unha vivenda está a converterse nalgo inaccesíbel para moitas persoas. O prezo do metro cadrado disparouse nos últimos meses, alcanzando os 2.042 euros de media estatal, un 8% máis que hai un ano. Este incremento tamén se notou en todas as comunidades autónomas. No caso de Galiza, colocouse nos 1.375 euros, case un 3% máis que en decembro de 2022.
Un informe mensual elaborado por Idealista con datos recompilados durante o pasado mes de decembro mostran a evolución dos prezos nos diferentes municipios de Galiza. A provincia máis cara para comprar un piso é Pontevedra, xa que o metro cadrado sitúase nos 1.608 euros de media. Séguelle A Coruña, con 1.346 euros.
Ourense e Lugo son as dúas provincias máis baratas, ideais para aqueles que non queiran investir grandes cantidades de diñeiro. Un piso duns 80 metros cadrados na primeira costa ao redor dos 90.000 euros, mentres que en Lugo roldaría os 80.000 euros.
Este é o pobo máis barato para comprar
O pobo máis barato para comprar unha vivenda está situado na provincia de Ourense. Trátase de Leiro, un municipio da comarca do Ribeiro con pouco máis de 1.400 habitantes e situado a menos de media hora da Cidade das Burgas. O prezo do metro cadrado sitúase nos 440 euros de media, o que significa que unha vivenda duns 80 metros cadrados custa uns 35.000 euros.
Leiro é o único pobo do país que conta cunhas cifras tan baixas. Aínda así, hai outros que tamén son bastante económicos. É o caso do municipio coruñés de Camariñas. É a localidade onde máis se reduciu o prezo no último ano (un 14,5% máis barato que hai un ano) e a que ten os prezos máis baixos da provincia. En concreto, o metro cadrado colócase nos 645 euros de media.
Isto significa que unha familia que adquira un piso duns 80 metros cadrados en Camariñas pagará pouco máis de 50.000 euros. Este prezo é similar noutros municipios como Ponteceso (A Coruña), A Cañiza (Pontevedra), Sarria (Lugo) ou Amoeiro (Ourense).
